Kumbidhar Waterfall Of Boudha District Tourist Places In Odia
ଏଠାକାର ପ୍ରାକୃତିକ ଶୋଭାରାଜି ଭିତରେ ପକ୍ଷୀଙ୍କ କଳରବ, ଝରଣାର କୁଳୁକୁଳ ନାଦ ଓ ଶୀତୁଆ ସକାଳରେ ସୂର୍ଯ୍ୟଙ୍କ ସ୍ୱର୍ଣ୍ଣିମ କିରଣ ପର୍ଯ୍ୟଟକଙ୍କୁ ବେଶ୍ ରୋମାଞ୍ଚିତ କରେ। ପର୍ଯ୍ୟଟକମାନେ ଝରଣା ପାଣିରେ ଗାଧୋଇବା ସହିତ ମାଛ ଧରିବାର ମଜା ମଧ୍ୟ ନେଇଥା’ନ୍ତି। ବିଶେଷ କରି ନଭେମ୍ବରରୁ ଫେବୃଆରୀ ମାସ ଯାଏ ଏଠାରେ ଲୋକଙ୍କ ଭିଡ଼ ଜମିଥାଏ। ବର୍ଷର ଅନ୍ୟ ଦିନଗୁଡ଼ିକରେ ବି କେହି କେହି ଏଠାକୁ ବଣଭୋଜି କରିବାକୁ ଆସନ୍ତି।
ସୁଶାନ୍ତ କଂହର ନାମକ ଜଣେ ପର୍ଯ୍ୟଟକ କହିଛନ୍ତି, “ବହୁ ଲୋକ ଏଠାକୁ ଆସୁଛନ୍ତି। ଏଠାରେ ବଣ ଭୋଜି ସହ ମାଛ ଧରିବା, ସେଲଫି ନେବା ଓ ଝରଣାରେ ପାଣି ଗାଧୋଇବାର ମଜା ନେଉଛନ୍ତି। ଏହାକୁ ରାଜ୍ୟ ସରକାର ପର୍ଯ୍ୟଟନସ୍ଥଳୀର ମାନ୍ୟତା ଦେଲେ ଏଠାକୁ ଆହୁରି ପର୍ଯ୍ୟଟକ ଆସିବେ।”
କେମିତି ଯିବେ:
ରାଜଧାନୀ ଭୁବନେଶ୍ୱରରୁ ଏହି ସ୍ଥାନର ଦୂରତା ୧୭୨ କିଲୋମିଟର। ସେହିପରି ବୌଦ୍ଧ ସଦର ମହକୁମାରୁ ଏହାର ଦୂରତା ୫୫ କି.ମି ହୋଇଥିବା ବେଳେ ଫୁଲ୍ବାଣୀରୁ ଏହାର ଦୂରତା ୪୫ କି.ମି। ବୌଦ୍ଧ ଜିଲ୍ଲା ଆଡେଣୀଗଡ଼ ପଞ୍ଚାୟତ ମାଧପୁର ଛକରୁ ଫୁଲବାଣୀ ରାସ୍ତାରେ ୩ କିଲୋମିଟର ଗଲେ ପଡ଼େ ଏହି ପିକନିକ୍ ସ୍ପଟ୍।
କେଉଁଠି ରହିବେ:
କୁମ୍ବିଧରକୁ ବୁଲିବାକୁ ଆସୁଥିବା ପର୍ଯ୍ୟଟକମାନଙ୍କ ପାଇଁ ରାତ୍ରୀଯାପନ ପାଇଁ ମାଧପୁର ଛକରେ ପୁର୍ତ୍ତବିଭାଗର ଡାକ ବଙ୍ଗଳା ଏବଂ ଆଡ଼େଣୀଗଡ଼ରେ ଜାତୀୟ ରାଜପଥ ବିଭାଗର ଡାକ ବଙ୍ଗଳା ରହିଛି।
ଏହି ସୌନ୍ଦର୍ଯ୍ୟଭରା ସ୍ଥାନଟି ବୌଦ୍ଧ ବନବିଭାଗ ଅଧୀନରେ ରହିଛି। ଏଠାରେ ଭିତ୍ତିଭୂମିର ବିକାଶ କରାଗଲେ ଆହୁରି ଅଧିକ ଲୋକଙ୍କ ଆଗମନ ହୁଅନ୍ତା।
