- କହ୍ନେଇଲାଲ ଦାସ-ରବି ପଟ୍ଟନାୟକଙ୍କ ‘ରାଗ ତୋଡ଼ି’ର ଭାଷାରେ କହିଲେ, ସେ “ଏକ ମଧୁର ଯନ୍ତ୍ରଣା, ଏକ ମଧୁସିକ୍ତ ବେଦନା।”
କହ୍ନେଇଲାଲ ଦାସ (୨୭ ଜୁନ ୧୯୪୭ - ୨୭ ଜୁଲାଇ ୧୯୭୫), ଜଣେ ଓଡ଼ିଆ ଗାଳ୍ପିକ ଥିଲେ ।୨୮ ବର୍ଷର ସ୍ୱଳ୍ପ ଜୀବକାଳ ମଧ୍ୟରେ ସେ ଅନେକ ଗଳ୍ପ ରଚନା କରିଥିଲେ ।
କହ୍ନେଇଲାଲ ଦାସ-Kanhei lal das biography
- ଜନ୍ମ ଓ ଜନ୍ମସ୍ଥାନ-୨୭ ଜୁନ ୧୯୪୭(କଲିକତା)
- ମୃତ୍ୟୁ-୨୭ ଜୁଲାଇ ୧୯୭୫ (ବୟସ ୨୮)କମର୍ଦ୍ଦା, ଭୋଗରାଇ,ବାଲେଶ୍ୱର
- ଶିକ୍ଷାନୁଷ୍ଠାନ-ମହାରାଜ କୃଷ୍ଣଚନ୍ଦ୍ର ଉଚ୍ଚବିଦ୍ୟାଳୟ, ଫକୀର ମୋହନ ସ୍ୱୟଂଶାସିତ ମହାବିଦ୍ୟାଳୟ
- ବାପା ବୋଉ-କ୍ଷେତ୍ରମୋହନ ଦାସ, ଅନିଲାବାଲା ମାଇତି
ବାଲ୍ୟ ଜୀବନ ଓ ଶିକ୍ଷା
କହ୍ନେଇଲାଲ, ୧୯୪୭ ମସିହାରେ ପଶ୍ଚିମବଙ୍ଗର କଲିକତାଠାରେ ଜନ୍ମ ଲାଭ କରିଥିଲେ । ପିତା କ୍ଷେତ୍ରମୋହନ ଦାସ ଓ ମାତା ଅନିଲାବାଲା ମାଇତିଙ୍କର ସେ ଜ୍ୟେଷ୍ଠ ପୁତ୍ର ଥିଲେ । କହ୍ନେଇଲାଲଙ୍କ ଆଉ ଚାରି ଜଣ ଭାଇଭଉଣୀ ଥିଲେ । ପିତା କ୍ଷେତ୍ରମୋହନ, କଲିକତାର ଏକ କାର୍ଯ୍ୟାଳୟରେ 'ରେକର୍ଡ଼ କିପର' ଭାବରେ କାର୍ଯ୍ୟ କରୁଥିଲେ । ଭାନୁ ଓ କୁନା ତାଙ୍କ ଡାକ ନାମ ଥିଲା । ପିଲାଟି ଦିନରୁ ସେ ଦାରିଦ୍ର୍ୟ ଭିତରେ ବଢ଼ିଥିଲେ । କମର୍ଦ୍ଦାରେ ପ୍ରାଥମିକ ସ୍କୁଲ ଶିକ୍ଷା ସମାପ୍ତକରି, ସେ ବାରିପଦାର ମହାରାଜ କୃଷ୍ଣଚନ୍ଦ୍ର ଉଚ୍ଚବିଦ୍ୟାଳୟରୁ ପ୍ରଥମ ଶ୍ରେଣୀରେ ମାଟ୍ରିକ ପାସ କରିଥିଲେ । ସ୍କୁଲ ସମୟରେ ସାହିତ୍ୟପ୍ରତି ଥିବା ଭଲପାଇବା ଯୋଗୁ, ସେ ଶୁଭ୍ରାବରଣୀ ପାଠାଗାର ଗଢିଥିଲେ । ବାଲେଶ୍ୱର ଫକୀରମୋହନ ମହାବିଦ୍ୟାଳୟରୁ, ସେ କଲେଜ ଶିକ୍ଷାଗ୍ରହଣ କରିଥିଲେ । ଏହି ସମୟରୁ ସେ ଟିଉସନ କରି ପାଠ ଖର୍ଚ୍ଚ ଭରଣା କରୁଥିଲେ ।
ବୃତ୍ତିଗତ ଜୀବନ
ବାଲେଶ୍ୱରରୁ ନିଜ ଶିକ୍ଷା ସମାପ୍ତକରି, କହ୍ନେଇଲାଲ ପଶ୍ଚିମବଙ୍ଗର ପାନ୍ନାଗଡ଼ଠାରେ ପ୍ରତିରକ୍ଷା ବିଭାଗରେ ଚାକିରି ଆରମ୍ଭ କରିଥିଲେ । ପରବର୍ତ୍ତୀ ସମୟରେ ସେ ଏ.ଜି. ଅଫିସରେ ଚାକିରି ପାଇ ଭୁବନେଶ୍ୱର ଚାଲିଆସିଥିଲେ । ବାଲେଶ୍ୱରରେ ପାଠ ପଢ଼ିବା ସମୟରୁ, ତାଙ୍କ ସାହିତ୍ୟ ଜୀବନ ବିକଶିତ ହୋଇଥିଲା ଓ ବିଭିନ୍ନ ପତ୍ରପତ୍ରିକାରେ ତାଙ୍କ ଲେଖା ପ୍ରକାଶ ପାଇବା ଆରମ୍ଭ ହୋଇଥିଲା । ୨୭ ଜୁନ ୧୯୭୫ ମସିହାରେ, ୨୮ ବର୍ଷ ବୟସରେ ଭୁବନେଶ୍ୱରଠାରେ ତାଙ୍କର ମୃତ୍ୟୁ ଘଟିଥିଲା ।
ତାଙ୍କ ସଂକ୍ଷିପ୍ତ ଜୀବନୀ-Kanhei lal das biography Odia
 |
| ଆଧାର: https://odisha.live |
- ଆହୁରି ପଢ଼ନ୍ତୁ: ଗୋପୀନାଥ ନାଥ ମହାନ୍ତି ଙ୍କ ଜୀବନୀ - Gopinath Mohanty Biography in Odia
- ଭକ୍ତକବି ମଧୁସୂଦନ ରାଓ ଙ୍କ ଜୀବନୀ - Biography of Poet Madhusudhan Rao
ଅଥଚ, ଏହି ପ୍ରାୟ ଆଠବର୍ଷ ମଧ୍ୟରେ କହ୍ନେଇ ଲାଲ ଲେଖିଯାଇଥିଲେ ଶତାଧିକ ଗଳ୍ପ ଓ ଦୁଇଟି ଉପନ୍ୟାସ। କିନ୍ତୁ ବିୟୋଗ ବେଳକୁ ତାଙ୍କର ଖଣ୍ଡିଏ ବି ବହି ପ୍ରକାଶ ପାଇନଥିଲା। ଏପରିକି, ସମସାମୟିକ କଥାକାର ଜଗଦୀଶ ମହାନ୍ତିଙ୍କ ସହ ମିଶି ଏକ ମିଳିତ ଗଳ୍ପପୁସ୍ତକ ପ୍ରକାଶ କରିବାର ସ୍ୱପ୍ନ ବି ରହିଯାଇଥିଲା ଅସମାପ୍ତ।
କହ୍ନେଇ ଲାଲଙ୍କ ବିୟୋଗ ପରେ, ‘ନବତରଙ୍ଗ’ ପତ୍ରିକାର ୧୯୭୫, ପୂଜାସଂଖ୍ୟାରେ ‘ଜୀବନଯାପନ’ ଶୀର୍ଷକରେ ଗୋଟିଏ ଲେଖା ଲେଖିଥିଲେ ରତିରଂଜନ ମିଶ୍ର। ତାହା ଥିଲା କହ୍ନେଇ ଲାଲଙ୍କ ସହ ତାଙ୍କର ଅନ୍ତରଙ୍ଗ ସ୍ମୃତିର ଆଲେଖ୍ୟ। ସେଥିରେ ରତିରଂଜନ ଦେଇଥିବା ସୂଚନା ଅନୁସାରେ, ନିଜର ପ୍ରକାଶିତ ଗଳ୍ପଗୁଡ଼ିକୁ ନେଇ ଚାରିଟି ସଂକଳନର ଯୋଜନା କରିଥିଲେ କହ୍ନେଇ ଲାଲ। ତାହାର ନାଆଁ ରଖିଥିଲେ, ୧. ମାନସାଙ୍କ, ୨. ସାଙ୍କେତିକ, ୩. ଜୀବନଯାପନ, ୪. ଯାହା ଯେମିତି ହୁଏ।
ମୃତ୍ୟୁପୂର୍ବରୁ ଅନ୍ତତଃ ଗୋଟିଏକୁ ଛାପା ରୂପରେ ଦେଖିବାର ଇଚ୍ଛା ତାଙ୍କର ଥିଲା। ସେଥିପାଇଁ କବି ସୈାଭାଗ୍ୟ କୁମାର ମିଶ୍ର ଓ ଔପନ୍ୟାସିକ ବିଭୂତି ପଟ୍ଟନାୟକଙ୍କୁ ସେ ଅନୁରୋଧ ବି କରିଥିଲେ। କିନ୍ତୁ ଶେଷ ପର୍ଯ୍ୟନ୍ତ ସେ ଇଚ୍ଛା ପୂରଣ ହୋଇପାରିନଥିଲା। ୨୬ ଜୁଲାଇର କାଳରାତି ପରେ, ୨୭ ତାରିଖର ସୂର୍ଯ୍ୟ ଉଠିବା ଆଗରୁ କହ୍ନେଇ ଲାଲଙ୍କ ଜୀବନର ସୂର୍ଯ୍ୟାସ୍ତ ହୋଇଗଲା। ସମୟ ଥିଲା ଭୋର୍ ୩ଟା ୪୫ ମିନିଟ୍। ସେଥିପାଇଁ ୨୭ ତାରିଖକୁ ହିଁ ତାଙ୍କର ବିଦାୟର ତାରିଖ ଭାବରେ ଗଣାଯାଏ।
 |
| ଆଧାର: https://odisha.live |
କହ୍ନେଇ ଲାଲଙ୍କ ବିୟୋଗ ପରେ, ସେଦିନ ତାଙ୍କର ବନ୍ଧୁ ଓ ଶୁଭେଚ୍ଛୁମାନେ ଗଢିଥିଲେ ‘କହ୍ନେଇ ଲାଲ ସ୍ମୃତିରକ୍ଷା କମିଟି’ ନାମରେ ଏକ ଅନୁଷ୍ଠାନ। ଓଡ଼ିଶାର ସାହିତ୍ୟ ଜଗତରେ ତାଙ୍କର ବିୟୋଗରେ ସୃଷ୍ଟି ହୋଇଥିବା ଭାବାଳୁତାକୁ ନେଇ ସ୍ମୃତି କମିଟି ପକ୍ଷରୁ ବିଜ୍ଞପ୍ତିମୂଳକ ସମ୍ବାଦଟିଏ ମଧ୍ୟ ବିଭିନ୍ନ ସମ୍ବାଦପତ୍ର ଓ ପତ୍ରପତ୍ରିକାରେ ପ୍ରକାଶ ପାଇଥିଲା। ତାହାର ବିଷୟ ଥିଲା- କହ୍ନେଇ ଲାଲଙ୍କ ସମଗ୍ର ରଚନାବଳୀର ଏକ ସମୃଦ୍ଧ ସଂକଳନ ଯଥାଶୀଘ୍ର ପ୍ରକାଶ ପାଇବ। ଯେଉଁମାନେ ସେହି ସଂକଳନର ଅଗ୍ରୀମ ଗ୍ରାହକ ହେବେ, ସେମାନେ ୧୦ଟଙ୍କା ଦେଇ ନିଜନିଜର ନାମ ପଞ୍ଜୀକୃତ କରନ୍ତୁ। ପ୍ରକାଶ ପାଇବା ପରେ ସଂକଳନଟିର ମୂଲ୍ୟ ଯଥେଷ୍ଟ ଅଧିକ ହେଲେ ମଧ୍ୟ, ସେମାନଙ୍କୁ ସେହି ମୂଲ୍ୟରେ ତାହା ଯୋଗାଇ ଦିଆଯିବ।
କହିବା ଅନାବଶ୍ୟକ ଯେ କହ୍ନେଇ ଲାଲଙ୍କ ମୃତ୍ୟୁର ଶୋକଛାୟା ସେତେବେଳକୁ ଅନେକଙ୍କୁ ଆଚ୍ଛନ୍ନ କରିରଖିଥିଲା। କହ୍ନେଇ ପ୍ରେମୀ ପାଠକ ପାଠିକା ବି ଝୁରି ହେଉଥିଲେ ଅକାଳରେ ଝରିଯାଇଥିବା ସେହି ଯୁବ କଥାଶିଳ୍ପୀଙ୍କୁ। ଫଳରେ, ସେଥିପାଇଁ ସାଧୁବାଦ କେବଳ ମିଳିଲା ନାହିଁ; ଅର୍ଥ ବି ଆଦାୟ ହେଲା ବେଶ୍। ତେବେ, ‘କହ୍ନେଇ ଲାଲ ସ୍ମୃତିରକ୍ଷା କମିଟି’ର ସଭାପତି ତଥା ‘ଚୁମ୍ବକ’ ପତ୍ରିକାର ସଂପାଦିକା ଶୈଳବାଳା ମହାନ୍ତି ସେ ବାବଦରେ ଗୋଟିଏ ହିସାବ ଦେଇଛନ୍ତି। ସେହି ହିସାବ କହେ, ସେତେବେଳେ ସେ ବାବଦରେ ଆଦାୟ ହୋଇଥିଲା ୧୮୫୦ ଟଙ୍କା। କିନ୍ତୁ ଶେଷସୁଦ୍ଧା ଯେଉଁ ପୁସ୍ତକଟି ପ୍ରକାଶ ପାଇଲା, ବିଜ୍ଞପ୍ତି ଅନୁରୂପେ ତାହା କହ୍ନେଇ ଲାଲଙ୍କ ରଚନାର ସମଗ୍ର ସଂକଳନ ନଥିଲା। ଥିଲା ୧୦୩ଟି ମଧ୍ୟରୁ କେବଳ ୧୩ଟି ଗଳ୍ପକୁ ନେଇ, ‘ଜୀବନ ଯନ୍ତ୍ରଣା ଓ ଯାହା ଯେମିତି ହୁଏ’ ଶୀର୍ଷକରେ ମାତ୍ର ୯୨ (୮୪+୮) ପୃଷ୍ଠାର ଏକ ଶୀର୍ଣ୍ଣ ସଂକଳନ। ମୂଲ୍ୟ ଥିଲା ମାତ୍ର ୫ ଟଙ୍କା। ମିହିର ପଟ୍ଟନାୟକ ତାହାର ମୁଖବନ୍ଧରେ ସ୍ୱୀକାର ମଧ୍ୟ କରିଛନ୍ତି ଯେ “ଓଡ଼ିଆ ସାହିତ୍ୟ ପାଇଁ ସେ ଛାଡ଼ି ଯାଇଛନ୍ତି ପ୍ରାୟ ୧୦୦ଟି ଗଳ୍ପ।” ଅର୍ଥାତ୍, କହ୍ନେଇ ଲାଲଙ୍କର ବାକି ୮୭ଟି ବା ୯୦ଟି ଗଳ୍ପ ଥିଲେ ବି ତାହା ସଂକଳିତ ହୋଇନଥିଲା; ଉପନ୍ୟାସ ଓ ଅନ୍ୟାନ୍ୟ ରଚନା ତ ଦୂରର କଥା। ସଂକଳନଟି ମଧ୍ୟ ଥିଲା ଖୁବ୍ ଦୁଃସ୍ଥ ଓ ଦୟନୀୟ। (ଛବି ପ୍ରଦତ୍ତ)
ସେହି ଦୁଃସ୍ଥ, ଦୟନୀୟ ଓ ଶୀର୍ଣ୍ଣକାୟ ସଂକଳନଟିର ପ୍ରକାଶନ ପରେ ବିତିଗଲା ଆହୁରି ପ୍ରାୟ ପାଞ୍ଚବର୍ଷ। କିନ୍ତୁ ‘ସ୍ମୃତିରକ୍ଷା କମିଟି’ ପକ୍ଷରୁ, କହ୍ନେଇ ଲାଲଙ୍କ ସ୍ମୃତିରକ୍ଷା ପାଇଁ ଆଉ କୌଣସି କାର୍ଯ୍ୟ ହେଲା ନାହିଁ। ପ୍ରଥମ କେତୋଟି ମାସ ବା ବର୍ଷେ ଦି’ବର୍ଷର ଭାବାବେଗ ଧୂମିଳ ହୋଇଗଲା। ନିଜ ନିଜର ଜୀବନ ଜଞ୍ଜାଳ ଆଗରେ। ପରେ ପରେ ସମସ୍ତେ ଯେମିତି ଭୁଲିଗଲେ କହ୍ନେଇ ଲାଲଙ୍କୁ।
 |
| ଆଧାର: https://odisha.live |
ପ୍ରାୟ ୧୯୮୧ ବେଳକୁ ଆରମ୍ଭ ହେଲା ଭୁବନେଶ୍ୱରର ଚିହ୍ନା ଜଣା ଲୋକଙ୍କର ଘର ଘର ବୁଲି ବିଭିନ୍ନ ପତ୍ରପତ୍ରିକାରୁ କହ୍ନେଇ ଲାଲଙ୍କ ଲେଖାଗୁଡ଼ିକର ସଂଗ୍ରହ। ତା’ ସହିତ ଆରମ୍ଭ ହେଲା ଶୈଳବାଳା ମହାନ୍ତିଙ୍କ ପାଖରେ ଥିବା କହ୍ନେଇ ଲାଲ ଦାସଙ୍କ ଲେଖାଫାଇଲଟିର ସନ୍ଧାନ। ଅନୁଜପ୍ରତିମ ବନ୍ଧୁ ତଥା କବି ଅଜିତ କୁମାର ଦାଶମହାପାତ୍ର ଥିଲେ ଶୈଳବାଳା ମହାନ୍ତିଙ୍କ ପରିବାରର ଘନିଷ୍ଠ। ସେତେବେଳକୁ ଶୈଳବାଳାଙ୍କର ବି ବିୟୋଗ ଘଟି ସାରିଥିଲା। ଅଜିତଙ୍କ ସହିତ ଯାଇ ସନ୍ଧାନ ନେବାରେ ତାଙ୍କ କନ୍ୟାଙ୍କଠାରୁ ସୂଚନା ମିଳିଲା ଯେ, ଶୈଳବାଳାଙ୍କ ବିୟୋଗର କିଛିଦିନ ପରେ, କହ୍ନେଇ ଲାଲଙ୍କର ଜଣେ ବନ୍ଧୁ ଫାଇଲଟିକୁ ମାଗିନେଇ ଆଉ ଫେରାଇ ନାହାନ୍ତି। ବିଭିନ୍ନ ଭାବରେ ଯୋଗାଯୋଗ କରିବା ପରେ ବି ତାଙ୍କଠାରୁ କୌଣସି ଉତ୍ତର ବା ସୂଚନା ମିଳିଲା ନାହିଁ। ସେହି ଫାଇଲଟି ଏଯାଏ ନିଖୋଜ ଅଛି। ମନେହୁଏ, ତାହା ଥିଲା କହ୍ନେଇ ଲାଲଙ୍କ ମୃତ୍ୟୁ ପରେ ତାଙ୍କୁ ଆଉଥରେ ମାରିଦେବାର ଏକ ହୀନ ଚକ୍ରାନ୍ତ।
ଆଜି କିନ୍ତୁ କହ୍ନେଇ ଲାଲ ମରିନାହାନ୍ତି। ସେ ସଂଜୀବିତ ରହିଛନ୍ତି ‘କହ୍ନେଇ କଥାଘର’ ଭିତରେ। କହ୍ନେଇ ଲାଲଙ୍କ ବିୟୋଗ ପରେ, ବାଲେଶ୍ୱରର ଫକୀର ମୋହନ ସାହିତ୍ୟ ପରିଷଦ ପକ୍ଷରୁ ‘କହ୍ନେଇନାମା’ ନାମରେ ଏକ ସୁଦୃଶ୍ୟ ସ୍ମାରକୀ ସଂକଳନ ପ୍ରକାଶ କରିଥିଲେ କବି ତଥା କହ୍ନେଇ ଲାଲଙ୍କର ଶୁଭେଚ୍ଛୁ ଓ ଅଭିଭାବକ ବ୍ରଜନାଥ ରଥ। ସେ ଏଥିପାଇଁ ଅକାତରରେ ସହଯୋଗର ହାତ ବଢାଇ ଦେଇଥିଲେ। ଆଜି ମନେ ପଡୁଛି, ସେତେବେଳେ ଜେରକ୍ସ ସୁବିଧା ନଥିଲା। ତେଣୁ, ଦିନ ପରେ ଦିନ ତାଙ୍କ ବାଲେଶ୍ୱର ଘରେ ବସି, ପୁରୁଣା ପତ୍ର ପତ୍ରିକାରୁ କହ୍ନେଇ ଲାଲଙ୍କ ଲେଖାସବୁ ମୁଁ ଟିପି ଆଣିଥିଲି। ଏ ସଂକଳନ ପାଇଁ କହ୍ନେଇଲାଲଙ୍କ ମାଆ ଅନିଲାବାଳା ଓ ଭାଇ ରବୀନ୍ଦ୍ରଙ୍କ ଠାରୁ ଅନୁମତି ପତ୍ର ଆଣିବାରେ ସମସ୍ତ ସହଯୋଗ କରିଥିଲେ, କହ୍ନେଇଲାଲଙ୍କର ବନ୍ଧୁ ତଥା କଥାକାର ନାରୁ ମହାନ୍ତି।
ପରିଶେଷରେ, କହ୍ନେଇ ଲାଲଙ୍କ ବିୟୋଗର ୧୧ ବର୍ଷ ପରେ, ୧୯୮୬ ମସିହାର ପବିତ୍ର ନେତ୍ରୋତ୍ସବ ଅବସରରେ, ଭୁବନେଶ୍ୱରର ସୂଚନା ଭବନ ପ୍ରେକ୍ଷାଳୟରେ ଉନ୍ମୋଚିତ ହେଲା ‘କହ୍ନେଇ କଥାଘର’। ଆଗ୍ରହର ସହ ତାହାକୁ ପ୍ରକାଶ କରିଥିଲେ ଫ୍ରେଣ୍ଡସ ପବ୍ଲିଶର୍ସର ମୁଖ୍ୟ ସହଦେବ ପ୍ରଧାନ। ସେଦିନର ସଭାରେ ଉନ୍ମୋଚକ ଭାବରେ ଯୋଗ ଦେଇ ସେହି ଉଦ୍ୟମର ଉଚ୍ଚ ପ୍ରଶଂସା କରିଥିଲେ ଜ୍ଞାନପୀଠ ବିଜେତା କବି ସୀତାକାନ୍ତ ମହାପାତ୍ର।
 |
| ଆଧାର: https://odisha.live |
କିନ୍ତୁ ସେ ସଂପର୍କରେ ସବୁଠୁ ସ୍ମରଣୀୟ କଥାଟି ହେଉଛି, ସମ୍ଭବତଃ ସେଦିନ ପ୍ରଥମଥର ପାଇଁ, ନିରକ୍ଷରା, ଦୁଃଖୀ ଓ ବିଧବା ମାଆଟିଏ, ରାଜଧାନୀ ସହରର ଶୀତତାପ ନିୟନ୍ତ୍ରିତ, ସମ୍ଭ୍ରାନ୍ତ, ଉଜ୍ଜ୍ୱଳ ବିଦ୍ୟୁତ୍ ଆଲୋକ ଉଦ୍ଭାସିତ ମଞ୍ଚର ପାହାଚ ଚଢ଼ିଥିଲା- ନିଜ ପୁଅର ଲେଖା ବହିର ପ୍ରଥମ ଖଣ୍ଡଟିକୁ ଗ୍ରହଣ କରିବାପାଇଁ। ସେଦିନ ସମଗ୍ର ପ୍ରେକ୍ଷାଳୟ ଯେତେବେଳେ କରତାଳିରେ ଉଛୁଳି ଉଠୁଥିଲା, ସେତେବେଳେ ଭରପୂର ଦର୍ଶକ ଦେଖିଥିଲେ ସେଇ ମାଆଟିର ଆଖିର ଦୁଇବୁନ୍ଦା ଲୁହ।
ଏ ଭିତରେ, ୨୦୧୪ରେ ‘କହ୍ନେଇ କଥାଘର’ର ଦ୍ୱିତୀୟ, ପରିବର୍ଦ୍ଧିତ ସଂସ୍କରଣ ପ୍ରକାଶ ପାଇଛି, ସେହି ଫ୍ରେଣ୍ଡସ ପବ୍ଲିଶର୍ସରୁ। ପ୍ରଥମ ସଂସ୍କରଣରେ ଥିଲା ୪୪ଟି ଗଳ୍ପ, ଦୁଇଟି ଉପନ୍ୟାସ, ଚାରିଟି କବିତା, ଦୁଇଟି ମିନିଗଳ୍ପ ଓ ଗୋଟିଏ ରମ୍ୟରଚନା ସହିତ କହ୍ନେଇ ଲାଲ ଦାସଙ୍କ ଡାଏରିର ସମ୍ପାଦିତ ଅଂଶ। ଦ୍ୱିତୀୟ ସଂସ୍କରଣରେ ଯୋଡ଼ା ହୋଇଛି ଆହୁରି ୧୪ଟି ଦୁଷ୍ପ୍ରାପ୍ୟ ଗଳ୍ପ ଏବଂ କହ୍ନେଇ ଲାଲଙ୍କୁ ଲେଖା ଚିଠିର ଏକ ଗୁଚ୍ଛ। ଅନ୍ୟାନ୍ୟ ବହୁ ମୂଲ୍ୟବାନ ସାମଗ୍ରୀ ମଧ୍ୟ ସାତଟି ପରିଚ୍ଛେଦରେ ସଂଯୋଜିତ ହୋଇଛି। ‘ଶେଷ ଓ ଶ୍ରେଷ୍ଠ ପ୍ରେମଗଳ୍ପ’ ଓ ‘ନାମହୀନ ଶେଷ ଗଳ୍ପ’ ନାମରେ ଆଉ ଦୁଇଟି ଗଳ୍ପ ମଧ୍ୟ ସ୍ଥାନ ପାଇଛି। ଏହା ସହିତ ପ୍ରଥମକରି ସଂଯୋଜିତ ହୋଇଛି ‘କହ୍ନେଇ -କଥା’ ନାମରେ କହ୍ନେଇଲାଲ ଦାସଙ୍କ ଜୀବନବୃତ୍ତାନ୍ତ। ଏହି ଦ୍ୱିତୀୟ ସଂସ୍କରଣ ଉନ୍ମୋଚିତ ହୋଇଥିଲା ୨୦୧୪ ମସିହାର ଜୁଲାଇ ୨୭ ତାରିଖରେ, କହ୍ନେଇ ଲାଲ ଦାସ ପଢିଥିବା ସ୍କୁଲଘରେ। ବହିଟିର ପୃଷ୍ଠା ସଂଖ୍ୟା ୫୫୬।
ରତିରଂଜନ ମିଶ୍ର ତାଙ୍କ ପୂର୍ବ ସୂଚିତ ସ୍ମୃତିଲେଖରେ ଲେଖିଥିଲେ, କହ୍ନେଇଲାଲଙ୍କ ମୃତ୍ୟୁ ପରେ, ତାଙ୍କ ପାଖରେ ଥିଲା କହ୍ନେଇଲାଲଙ୍କର ଚାରିଟି ଡାଏରି, ୩୨ଟି ଚିଠି ଓ ୧୫୭ଟି ଫଟୋ। ଲେଖାଥିବା ଫାଇଲଟି ପରି ସେଗୁଡ଼ିକ ବି ଏବେ ନିଖୋଜ। ପ୍ରଥମ ସଂସ୍କରଣର ପ୍ରକାଶ ଅବସରରେ ବହୁ କଷ୍ଟରେ ଆମେ ତିନିଟି ଡାଏରି ଉଦ୍ଧାର କରିବାରେ ସକ୍ଷମ ହୋଇଥିଲୁ। ତାହାର ସମ୍ପାଦିତ ଅଂଶ ‘କହ୍ନେଇ କଥାଘର’ରେ ସଂକଳିତ ମଧ୍ୟ ହୋଇଛି। କିନ୍ତୁ, ବାକି ଗୋଟିଏ ଡାଏରି ଆଜି ବି ନିଖୋଜ ଅଛି।
କହ୍ନେଇ ଲାଲଙ୍କ ମୃତ୍ୟୁକୁ ଆଜି ୪୫ ବର୍ଷ ହେଲା। ଏବେ ଅନ୍ତତଃ ତାଙ୍କର ବନ୍ଧୁ ଲୁଚାଇ ରଖିଥିବା ସେଇ ଫାଇଲଟିକୁ କାଢନ୍ତୁ! କହ୍ନେଇ ଲାଲଙ୍କର ସମଗ୍ର ରଚନା ଲୋକଲୋଚନକୁ ଆସୁ !!
ମୁଁ ଜାଣେନା, ସେ ସୁଦିନ କେବେ ଆସିବ କି ନା। ତେବେ ଏତିକି ବିଶ୍ୱାସ ଅନ୍ତତଃ ଅଛି ଯେ ତାହା କେବେ ନଆସିଲେ ବି ଓଡ଼ିଆ ସାହିତ୍ୟରେ କହ୍ନେଇ ଲାଲ ମରିବେ ନାହିଁ। ‘କହ୍ନେଇ କଥାଘର’ ଥିବାଯାଏ ସେ ରହିବେ। ମୁଖଶାଳାଟି ଭିତରେ କୋଣାର୍କ ପରି !!
ସାହିତ୍ୟ ସର୍ଜନା
କଲେଜ ପଢୁଥିବା ବେଳେ, ପ୍ରଥମକରି ସେ ଚକ୍କର ନାମରେ ଏକ ରମ୍ୟରଚନା ଲେଖିଥିଲେ । ତାଙ୍କର ପ୍ରଥମ ଗପ ବିବର୍ତ୍ତନବାଦ ୧୯୬୮ରେ ଓ ଶେଷ ଗପ ଧୃତରାଷ୍ଟ୍ରର ଆଖି ୧୯୭୫ରେ ପ୍ରକାଶ ପାଇଥିଲା ।ଜୀବକାଳ ମଧ୍ୟରେ ତାଙ୍କର କୌଣସି ପୁସ୍ତକ ଛପାଯାଇ ପାରିନଥିଲା । ମୃତ୍ୟୁ ପରେ, ଦୁଇଖଣ୍ଡ ପୁସ୍ତକ ପ୍ରକାଶିତ ହୋଇଥିଲା ।
- ଜୀବନ ଯନ୍ତ୍ରଣା ଓ ଯାହା ଯେମିତି ହୁଏ
- କହ୍ନେଇ କଥାଘର
ପୁରସ୍କାର ଓ ସମ୍ମାନ
କହ୍ନେଇଲାଲଙ୍କ ମୃତ୍ୟ ପରେ ତାଙ୍କ ପ୍ରତି ନିବେଦନ କରାଯାଇଥିବା ସନ୍ଦେଶଗୁଡ଼ିକୁ ନେଇ, ନାଟ୍ୟକାର ରତି ରଞ୍ଜନ ମିଶ୍ର, କନହେଇଲାଲ ଦାସଙ୍କୁ ଅନ୍ତରଙ୍ଗ ସ୍ମୃତିର ଆଲେଖ୍ୟ ପ୍ରକାଶ କରିଛନ୍ତି ।କହ୍ନେଇ କଥା ସଂସଦ ତରଫରୁ ତାଙ୍କ ଜନ୍ମବାର୍ଷିକୀରେ ପ୍ରତିବର୍ଷ କହ୍ନେଇ କଥା ପୁରସ୍କାର ପ୍ରଦାନ କରାଯାଏ ।
Tag: କଥାକାର କହ୍ନେଇ ଲାଲ ଦାସ, Kanhei lal das biography Odia, Kanheilal book, kanhei lal das image, କହ୍ନେଇଲାଲ ଦାସ ଙ୍କ ଜୀବନୀ, Kanhei lal das, କହ୍ନେଇଲାଲ ଦାସ
